ԵԱ ԵՐԵՎԱՆ

ՀԲԸՄ Երիտասարդ արհեստավարժները (ԵԱ) աշխարհի տարբեր ծայրերում գտնվող ԵԱ խմբերի և աջակիցների զարգացող ցանց է, որի նպատակն է հայկական ինքնության և ժառանգության պահպանումը 22-40 տարեկան հայ երիտասարդների շրջանում:

Վարելով բաց քաղաքականություն` ԵԱ-ների համաշխարհային ցանցը խրախուսում է երիտասարդներին ընդգրկվել և ներգրավվել իր գործունեության մեջ և արդեն իսկ ձեռք է բերել միջազգային ճանաչում համայնքային կյանքի և ազգային պատկանելության զգացումների տարածման համար:

Այսօր ՀԲԸՄ երիտասարդ արհեստավարժներն իրենց տեսակի մեջ հանդիսանում են ամենամեծ հայկական ԵԱ ցանցը:

Փորձելով ապահովել դրական տեղաշարժեր` ԵԱ շարժումը սկիզբ առավ 1995թ.-ին` հիմնելով իր առաջին խումբը Լոս Անջելեսում:

Այդ օրվանից ի վեր ցանցն ընդլայնվել է` կազմավորելով խմբեր Հյուսիսային Կալիֆորնիայում, Նյու Յորքում, Օրինջ Քաունթիում, Լիբանանում, Ֆիլադելֆիայում, Փարիզում, Պլովդիվում, ՍոֆիայումԲոստոնում, Տորոնտոյում, Լոնդոնում, Երևանում, Ավստրիայում, ԲրազիլիայումՎաշինգտոնումԲուենոս Աերեսում, Մոնրեալում, Համբուրգում, Միացյալ Արաբական Էմիրություններում, Մարսելում, և Չիկագոյում` համագործակցելով Մոսկվայում գործող ՍԻՎԱՄ և Ֆրանկֆուրտում գործող ՀԱՅՔ կազմակերպությունների հետ.

ՀԲԸՄ Երիտասարդ Արհեստավարժների խմբին միանալու համար լրացրեք գրանցման թերթիկը :

------------------------------------------------------------------------------------------------------------------------------------

ՍՈՑԻԱԼԱԿԱՆ ԽՆԴԻՐՆԵՐԸ ՀԲԸՄ ԵԱ ԵՐԵՎԱՆՅԱՆ ԹԻՄԻ ՈՒՇԱԴՐՈՒԹՅԱՆ ԿԵՆՏՐՈՆՈՒՄ

ԿԻՆՈԴԻՏՈՒՄ

Չնայած ամառվա ավելի թեթև ու հանգիստ գրաֆիկին, ՀԲԸՄ Երևանի Երիտասարդ Արհեստավարժները չեն դադարում կազմակերպել հետաքրքիր միջոցառումներ ու հանդիպումներ: Հունիսի 12-ին ՀԲԸՄ երիտասարդները հրավիրեցին բոլոր հետաքրքրվողներին մասնակցելու երիտասարդ ու տաղանդավոր ռեժիսոր Ադրինե Գրիգորյանի «Բավական» ֆիլմի ցուցադրությունը ՀԲԸՄ Երևանի գրասենյակի դահլիճում: «Բավական» կարճամետրաժ ֆիլմը պատմում է Հայաստանում պտղի սեռով պայմանավորված հղիության արհեստական ընդհատումների մասին: Ֆիլմում ներկայացված են տարբեր մարդկանց կյանքի պատմություններ` միահյուսված մասնագիտական կարծիքների և գնահատականների, ինչպես նաև պաշտոնական վիճակագրության հետ: Ֆիլմը մեծ հնչեղություն էր ստացել և դահլիճը լեփ լեցուն էր: Ցուցադրությանը ներկա էր նաև ֆիլմի ռեժիսորը` Ադրինե Գրիգորյանը, որը խոսեց ֆիլմի, նրա հերոսների, նկարահանումների ու արձագանքների մասին: Ֆիլմի ցուցադրությանը ներկա էին նաև ՀԲԸՄ Կենտրոնական վարչական ժողովի անդամ Վազգեն Յակուբյանը, ՀԲԸՄ Հայաստանի տնօրեն Արփի Վարդանյանը, մի շարք ՀԿ-ների ներկայացուցիչներ, ուսանողներ: Ավարտից հետո ֆիլմի հեղինակը պատասխանեց ներկաների հարցերին: Ծավալվեցին բուռն ու հետաքրքիր քննարկումներ: Հիշեցնենք, որ ֆիլմն այս տարի ընդգրկվել էր Կաննի կինոփառատոնի արտամրցութային ծրագրում, ինչպես նաև «Ոսկե ծիրան» 10-րդ հոբելյանական կինոփառատոնի «Հայկական համայնապատկեր» մրցութային ծրագրում:

ՀԱՆԴԻՊՈՒՄ ՀՀ ԲՆԱՊԱՀՊԱՆՈՒԹՅԱՆ ՓՈԽՆԱԽԱՐԱՐԻ ՀԵՏ

Հունիսի 4-ին տեղի ունեցավ ՀԲԸՄ Երիտասարդ Արհեստավարժների կազմակերպած մեկ այլ միջոցառում` հանդիպում ՀՀ բնապահպանության փոխնախարար Խաչիկ Հակոբյանի և մի քանի փորձագետների` «Հատուկ պահպանվող տարածքների համակարգի զարգացում» ծրագրի ղեկավար Կարեն Ճենտերեճյանի և բնապահպանության միջազգային փորձագետ Էրիկ Գրիգորյանի հետ: Հանդիպմանը քննարկվեցին այնպիսի թեմաներ, ինչպիսիք են Հայաստանի բնապահպանական քաղաքականությունը, շրջակա միջավայրի կառավարման մեխանիզմներն ու միջազգային փորձը, ինչպես նաև ՀՀ անդամակցությունը միջազգային բնապահպանական կոնվենցիաներին: Վերջին շրջանում բնապահպանական խնդիրները Հայաստանում դարձել են շատ արդիական ու հրատապ, ինչն էլ հատուկ սրություն հաղորդեց այս հանդիպմանը: Հետաքրքվողները շատ էին և այս հանդիպումը նույնպես անցավ լեցուն դահլիճում և տևեց ծրագրավորվածից երկար: Հնչեցին առկա հիմնախնդիրների վերաբերյալ սուր հարցեր: Իրենց հերթին ՀԲԸՄ երիտասարդ արհեստավարժները կիսվեցին այս ոլորտում իրենց ծավալած գործունեությամբ ու փորձով:

 
Դուք այստեղ եք՝ Home ԵԱ ԵՐԵՎԱՆ ՍՈՑԻԱԼԱԿԱՆ ԽՆԴԻՐՆԵՐԸ ՀԲԸՄ ԵԱ ԵՐԵՎԱՆՅԱՆ ԹԻՄԻ ՈՒՇԱԴՐՈՒԹՅԱՆ ԿԵՆՏՐՈՆՈՒՄ

Շնորհակալություն բաժանորդագրվելու համար: