Ծրագրեր

Հ.Բ.Ը. Միութեան 85րդ Ընդհանուր Անդամական Ժողով

Հալէպի Պատմական Բերդը Աննախընթաց Փառատօնի թատերավայր

Հայկական Բարեգործական Ընդհանուր Միութեան տարեգրութեան մէջ հպարտառիթ էջեր արձանագրուեցան Սեպտեմբեր 30-Հոկտեմբեր 7 օրերուն, Հալէպի մէջ գումարումովը Միութեան Երկամեայ Ընդհանուր Անդամական Ժողովին: Արդարեւ, Միութեան Կեդրոնական Վարչական Ժողովի անդամներ, գլխաւորութեամբ Նախագահ Տիար Պերճ Սեդրակեանի, մասնաճիւղերու պատկան մարմիններու ներկայացուցիչներ, իրաւասու անդամներ եւ բարեկամներ Միջին Արեւելքէն, Եւրոպայէն, Ամերիկայի Միացեալ Նահանգներէն, Հարաւային Ամերիկայէն եւ Հայաստանէն, Հալէպ ժամաներ էին քննելու Միութեան անցնող երկու տարիներու նիւթա-բարոյական գործունէութիւնը եւ նոր մարտահրաւէրներու լոյսի ներքոյ ծրագրելու գալիք տարիներու աշխատանքները: Հ.Բ.Ը. Միութեան 85րդ Ընդհանուր Անդամական Ժողովի եւ Յարակից Ձեռնարկներու Հիւրընկալ Գործադիր Մարմինին կողմէ խնամքով եւ ամենայն բծախնդրութեամբ պատրաստուած յայտագիրը սկիզբ առաւ Չորեքշաբթի 1 եւ Հինգշաբթի 2 Հոկտեմբերին, Տէր Զօր եւ Փալմիրա կատարուած այցելութիւններով: Տէր Զօրի մատուռէն ներս հոգեհանգիստի արարողութիւն կատարուեցաւ Ապրիլեան նահատակներուն եւ Միութեան հանգուցեալ բարերարներուն յիշատակին, ապա խումբը այցելեց Տէր Զօրի թանգարան: Հոկտեմբեր 2-ին, Հ.Բ.Ը.Մ.ի Գալուստ Կիւլպէնկեան կեդրոնէն ներս տեղի ունեցաւ Բարի Գալուստի ընդունելութիւն: Ուրբաթ, 3 Հոկտեմբեր 2008ը աստեղային օր մը եղաւ հալէպահայութեան պատմութեան մէջ: Արդարեւ, աշխարհի հնագոյն քաղաքներէն Հալէպի խորհրդանիշ պատմական բերդին մէջ տեղի ունեցաւ Հայկական Բարեգործական Ընդհանուր Միութեան եւ Հայ Երիտասարդաց Ընկերակցութեան Սուրիոյ Շրջանակին կազմակերպած գեղարուեստական աննախընթաց փառատօնը` բարձր հովանաւորութեամբ Սուրիոյ Աշխատանքի եւ Ընկերային հարցերու նախարարուհի Դոկտ. Տիեալա Ալհաճ Արէֆի: Գեղարուեստական բարձր որակով գործադրուած Փառատօն-Արուեստի երեկոյին ներկայ գտնուեցան աւելի քան չորս հազար հալէպահայեր, որոնք լեցուցած էին բերդին ամֆիթատրոնը: Փառատօնը եզրափակուեցաւ հրավառութեամբ մը, որ գեղեցկօրէն զարդարեց Հալէպի երկնակամարը:

Հ.Բ.Ը.Մ.ի 85րդ Ընդհանուր Անդամական Ժողով

Շաբաթ, 4 Հոկտեմբեր 2008, Հալէպի «Շերաթոն» պանդոկի սրահին մէջ բացուեցաւ Հ.Բ.Ը.Մ.ի 85րդ Ընդհանուր Անդամական Ժողովի Առաջին նիստը` Հովանաւորութեամբ Հ.Բ.Ը.Մ.ի Կեդրոնական Վարչական Ժողովին եւ նախագահութեամբը Մեթր Պերճ Սեդրակեանի: Յատուկ հրաւէրով ժողովին ներկայ էր նաեւ Հայաստանի Հանրապետութեան Սփիւռքի նախարարուհի Տիկին Հրանոյշ Յակոբ եանը: Նոր Դար Նոր Տեսլական խորագրով այս Անդամական Ընդհանուր Ժողովը, որ առաջինն էր Միութեան Երկրորդ հարիւրամեակի սեմին, յատկանշական էր իր տարողութեամբ եւ մանաւանդ կայացումովը պատմական Հալէպ քաղաքին մէջ, որ կը խորհրդանշէր ցեղասպանութենէն վերապրած հայութեան կենսունակութիւնը: Ժողովը հաստատեց անցնող երկու տարիներուն, նոր հրամայականներու դիմաց Միութեան որդեգրած նոր կողմնորոշումները եւ իրագործումները, շեշտելով համամիութենական գործելաոճը եւ Հայրենիք-Սփիւռք փոխադարձ հզօրացումի քաղաքականութիւնը: Հ.Բ.Ը.Մ.ի Նախագահ Մեթր Պերճ Սեդրակեան իր բացման խօսքին մէջ ըսաւ. «Հ.Բ.Ը. Միութեան 85րդ Ընդհանուր Անդամական Ժողովը որ համախմբած է մեզ պատմական Հալէպ քաղաքին մէջ, առիթ մըն է անդրադառնալու մեր ազգանուէր Միութեան երախտաշատ գործունէութեան: Միաժամանակ, անիկա պատեհութիւն մըն է գիտակցելու այն առաջնորդ եւ պատասխանատու դերին, որ վստահուած է մեզի, իբր համազգային մեծագոյն կազմակերպութիւն, մեր ազգի եւ Միութեան անկիւնադարձային այս հանգրուանին Խօսելով Միութեան ապագայ ծրագիրներուն մասին, Նախագահ Սեդրակեան ըսաւ. «Պէտք է իրատեսութեամբ ընդունինք, թէ նոր սերունդը այլեւս չ’ապրիր անցեալին մէջ, շաղուած է իր շրջապատի ընկերային եւ մշակութային իրականութեան եւ այդ իսկ պատճառով ենթակայ է կորսնցնելու իր դիմագիծը եւ հեռանալու հայ կեանքի աւանդական գործունէութիւններէն, մասնաւորաբար ոչ-հայրենամերձ գաղութներու մէջ: Այս ուղղութեամբ արդէն ճշդած ենք մեր կողմնորոշումը եւ առած հիմնական նախաքայլեր, միշտ իբր հիմք ունենալով Հայաստանի իրականութիւնը եւ անոր հետ մնայուն հաղորդակցութեան կենսական անհրաժեշտութիւնը»: Միութեան 2006-2007 տարեշրջաններու ընդհանուր նիւթական եւ բարոյական, ինչպէս նաեւ Հաշուեքննիչ Յանձնախումբի տեղեկագրերը յաջորդաբար ներկայացուեցան Կեդրոնական Վարչական Ժողովի անդամներ Ռուբէն Քէշիշեանի, Սինան Սինանեանի եւ Վազգէն Եագուպեանի կողմէ: Հ.Բ.Ը.Միութեան 85րդ Ընդհանուր Անդամական Ժողովի Նշանակիչ Յանձնախումբի յանձնարարութեամբ, Կեդրոնական Վարչական Ժողովի անդամներ վերընտրուեցան Նախագահ Մեթր Պերճ Սեդրակեանը, Արիս Ադամեանը, Ժոզէֆ Պասրալեանը, Նազարէթ Ֆըստըքճեանը, Վահէ Կապրաշը, Արտա Ն. Յարութիւնեանը, Սարգիս Ճէպէճեանը, Լեւոն Նազարեանը եւ Սէմ Սիմոնեանը: Առաջարկուեցաւ իբրեւ ՀԲԸՄի Կեդրոնական Վարչական Ժողովի նոր անդամ ընտրել Երուանդ Զօրեանը, որուն թեկնածութիւնը միաձայնութեամբ ընդունուեցաւ ժողովին կողմէ: Հ.Բ.Ը.Մ.ի 85րդ Ընդհանուր Անդամական Ժողովը առիթ էր նաեւ պատուելու այն անձնաւորութիւնները, որոնք կարեւոր նպաստ բերած էին Սփիւռք-Հայրենիք յարաբերութիւններու սերտացումին եւ Միութեան գործունէութեան ծաւալումին: Ձեռամբ Նախագահ Պերճ Սեդրակեանի, պարգեւատրուեցան Հայաստանի Հանրապետութեան Սփիւռքի նախարարուհի Տիկին Հրանոյշ Յակոբեանը, Հայաստանի Հանրապետութեան Արտաքին Գործոց նախկին Նախարար Վարդան Օսկանեանը (ի բացակայութեան), Virtual College ծրագրի ղեկավարներէն, հայրենի գիտնական Սամուէլ Շուքուրեանը, Խորհրդային Հայաստանի Սփիւռքի Կոմիտէի նախկին ղեկավարներէն եւ «Մոմճեան» Հիմնադրամի Տնօրէն Ռոմէն Կոզմոյեանը, Սուրիոյ մօտ Հայաստանի Հանրապետութեան նախկին Դեսպան Լեւոն Սարգիսեանը եւ Միութեան Միլանոյի մասնաճիւղի Ատենապետուհի Կէկէլ Խաչատուրեանը: Շնորհակալութիւն յայտնելով պարգեւատրումի առիթով, մեծարեալները դրուատեցին Հ.Բ.Ը.Մ.ի ազգաշէն գործունէութիւնը: Հ.Բ.Ը.Մ.ի Դամասկոսի տեղական մասնաժողովի Փ.Ատենապետ Պերճ Պարսումեան ընթերցեց Բանաձեւումի Յանձնախումբի որոշումները, որոնք վաւերացուեցան Ժողովին կողմէ: Ժողովը եզրափակուեցաւ Նախագահ Պերճ Սեդրակեանի փակման խօսքով, որ շնորհակալութիւն յայտնելով Հ.Բ.Ը.Մ.ի Սուրիոյ Յանձնաժողովին եւ Հիւրընկալ Մարմինին, ընդհանուր գիծերով ներկայացուց Միութեան յառաջիկայ երկու տարիներու գործունէութեան հիմնակէտերը: Հակառակ տնտեսական վերիվայրումներու, Միութեան հաշուեկշիռը առողջ պատկեր մը կը պարզէ: 85րդ Ընդհանուր Անդամական Ժողովին ներկայացուեցաւ Հ.Բ.Ը.Մ.ի 2006-2007 երկամեայ մանրամասնեալ տեղեկագիրը եւ հաշուեկշիռը ներկայացնող հրատարակութիւն մը, որով ժողովականներ հանգամանօրէն ծանօթացան միութեան ելեւմուտքին: Ժողովին յաջորդեց ճաշկերոյթ մը նոյն պանդոկէն ներս: Նոյն օրը երեկոյեան, նոյնպէս պանդոկին մէջ, տեղի ունեցաւ Հ.Բ.Ը.Մ.-ի 85րդ Ընդհանուր Անդամական Ժողովի առթիւ հրաւիրուած Կալա-Պարահանդէսը: Կիրակի, Հոկտեմբեր 5ին, հիւրերը այցելեցին Հ.Բ.Ը.Միութեան Լ. Նաճարեան-Գ.Կիւլպէնկեան Երկրորդական Վարժարան, ուր դիմաւորուեցան դպրոցի աշակերտութեան եւ ուսուցչական կազմին կողմէ: Կիւլպէնկեան հանդիսասրահին մէջ վարժարանին սաները գեղարուեստական կոկիկ յայտագիր մը ներկայացուցին հիւրերուն, որմէ ետք ելոյթ ունեցան վարժարանի Տնօրէն Աւետիս Պագգալեանը եւ Նախագահ Մեթր Պերճ Սեդրակեանը, որ խօսեցաւ Հ.Բ.Ը.Մ.ի կրթական առողջ գործունէութիւն ծաւալող վարժարաններուն եւ ընդհանրապէս Միութեան ծաւալած գործունէութեան մասին: Հանդիսութեան աւարտին հիւրերը անցան Հ.Բ.Ը.Մ.ի Գալուստ Կիւլպէնկեան կեդրոն, ուր Միութեան Հալէպի պատասխանատուները հիւրերուն ծանօթացուցին կեդրոնի յարկերուն վրայ տեղադրուած Միութեան գրասենեակներն ու գործունէութեան համար նախատեսուած սրահները: Հիւրերը դիտեցին նաեւ Հ.Ե.Ը.ի Սարեան Ակադեմիայի սաներու գեղանկարչական ցուցահանդէսի աշխատանքները: Կէսօրին, նոյն կեդրոնի «Դուին» ճաշասրահին մէջ, տեղի ունեցաւ ճաշկերոյթ մը: Երկուշաբթի, 6 Հոկտեմբերին, առաւօտեան ժամը 10:00ին «Ալ Շաապ» նախագահական ապարանքին մէջ, Սուրիոյ Հանրապետութեան Նախագահ Դոկտ.Պաշար Ասատ ընդունեց Հ.Բ.Ը.Մ.ի Նախագահ Պերճ Սեդրակեանի գլխաւորած պատուիրակութիւնը: Շուրջ մէկուկէս ժամ տեւած հանդիպումը առիթ էր շնորհակալութիւն եւ երախտագիտութիւն յայտնելու Նախագահ Պաշար Հաֆէզ Ասատին` սուրիահայութեան հանդէպ ցուցաբերած հոգատարութեան եւ հովանաւորութեան համար, ինչպէս նաեւ խօսակցելու շրջանային քաղաքական եւ տնտեսական իրադարձութեանց շուրջ: Ընդհանուր Անդամական Ժողովի մասնակիցներ Դամասկոսի շրջանին մէջ շրջապտոյտ մը ունեցան դէպի Սէյտնայա եւ Մաալուլա վանքեր, ինչպէս նաեւ Ումաուի Մզկիթ: Հայկական Բարեգործական Ընդհանուր Միութեան 85րդ Ընդհանուր Անդամական Ժողովը նոր ոգեւորութիւն յառաջացուց միութեան աշխարհատարած մասնաճիւղերը ներկայացնող եւ Հալէպ ժամանած անդամներու մօտ, որոնք գօտեպնդուած Հալէպի Մայր Գաղութին մէջ գործող Հ.Բ.Ը.Մ.ի բոլոր մարմիններուն կատարած կազմակերպչական հաւատաւոր աշխատանքով, իրենց գաղթօճախները վերադարձան լաւագոյն յուշերով ու տպաւորութիւններով` միշտ ծառայելու համահայկական այս կազմակերպութեան ազգաշահ նպատակներուն