Articles

Հ.Բ.Ը. ՄԻՈՒԹԵԱՆ ՆԱԽԱԳԱՀԻ ՆՈՐ ՏԱՐՈՒԱՆ ՊԱՏԳԱՄԸ

Մինչ վերանորոգ եռանդով եւ բարձր ակնկալութիւններով կը թեւակոխենք 2012-ը, մեր անդամակցութեան, բարերարներուն, նուիրատուներուն եւ Հայկական Բարեգործական Ընդհանուր Միութեան բարեկամներուն կը փոխանցեմ առողջ եւ ծաղկուն Նոր Տարուան լաւագոյն մաղթանքներս: Թող ան ըլլայ արգաւանդ՝ ուրախութեամբ եւ յաջողութիւններով: Մեծ գոհունակութեամբ եւ հպարտութեամբ կրնանք հաստատել թէ անցնող տարին յատկանշուեցաւ Հ.Բ.Ը.Մ.ի իրագործած բազմաթիւ յաջող եւ ուռճացող ծրագիրներով ու գործունէութեամբ, միութեան աշխարհատարած համայնքներուն թէ Հայաստանի ու Ղարաբաղի մէջ: Հաւատարիմ մեր մէկդարեայ ազգային առաքելութեան, մենք մուիրումի եւ ծառայութեան անկեղծ ոգիով, կը հաստատենք յարատեւութեան մեր կամքը ի խնդիր հայ ժողովուրդի եւ հայրենիքի բարօրութեան: 2011 տարին մեր ազգին համար մեծապէս յատկանշական էր: Հայաստանի անկախութեան 20-րդ տարեդարձը մեր հանրապետութեան եւ հայրենի ժողովուրդին հերոսական իրագործումները նշող պատմական խորիմաստ անկիւնադարձ մը հանդիսացաւ: Անիկա լրումն էր երկու տասնամեակներ ամբողջ, անչափելի զոհողութիւններու, զրկանքներու եւ դժուարութիւններու գինով ձեռք բերուած ակնառու իրագործումներու: Պայծառ առիթ մը տօնակատարութեանութեան ու նոր հոլովոյթներու՝ միաժամանակ, բոլոր նորակազմ հանրապետութիւններու յատուկ մարդկային իրաւանց, տնտեսական եւ ժողովրդավարական աժէքներու վերաբերեալ առկայ խնդիրներու եւ թերութիւններու նկատմամբ՝ շրջահայեացութեամբ: Մեր հաստատաքայլ յառաջընթացին մէջ, մենք պէտք է համարձակութեամբ դիմագրաւենք մեր դէմ ցցուող հասարակաց խոչընդոտները, ապահովելու համար Հայաստանի անվտանգութիւնը եւ աջակից ըլլալու անոր՝ յառաջիկայ նորանոր իրագործումներու մեր միացեալ ճամբուն վրայ: 2012 տարին՝ ռազմավարական համագործակցութեան եւ նոր նախաձեռնութիւններ կատարելու մեր հաւաքական կամքին փորձաքարը պիտի հանդիասանայ: Հայ Սփիւռքի Տարին պիտի ըլլայ ան, գործարար փայլուն նոր սերունդին ուղղուած շեշտաւորումով, նաեւ սփիւռքահայ համայնքներու միջեւ համակարգուած գործակցութեան վերանորոգ սեւեռումով: Միացեալ եւ համակարգուած ուժերով բոլորս պէտք է ազդու եւ արդիւնաւոր դեր կատարենք Հայաստանի եւ Ղարաբաղի զարգացման եւ բարգաւաճումին, ինչպէս նաեւ մեր ազգային պահանջատիրութեան եւ հատուցման իրաւունքի հետապնդումի աշխատանքներուն մէջ: Ցեղասպանութեան 100-ամեակի մտասեւեռումով գործելու տարին է ասիկա: Այս խոր հասկացողութիւններով եւ պատասխանատուութեան ու սուր ստիպողականութեան բարձր գիտակցութեամբ է որ կը դիմագրաւենք Նոր Տարին: Կոչ կ'ուղղենք բոլոր հայ ազգին, միացնելու մեր ուժերը ազգաշինութեան վսեմ գործին շուրջ: Լաւագոյն մաղթանքներով՝ Պերճ Սեդրակեան/td>

 

 
Դուք այստեղ եք՝ Home

Շնորհակալություն բաժանորդագրվելու համար: