Articles

ԱՄԱՆՈՐԻ ՇԵՄԻՆ ՆՈՐ ՀԵՌԱՆԿԱՐՆԵՐՈՎ ՅԵՏԱԴԱՐՁ ԱԿՆԱՐԿ ԱՆՑՆՈՂ ՏԱՐՈՒԱՆ ԳՈՐԾՈՒՆԷՈՒԹԵԱՆ ՎՐԱՅ

Սիրելի Միութենականներ, Նոր տարուան սեմին, Հայկական Բարեգործական Ընդհանուր Միութեան Կեդրոնական Վարչական Ժողովին կողմէ եւ անձնապէս, ձեզի կը փոխանցենք մեր ջերմագոյն ողջոյնները եւ բարեմաղթութիւնները: Անցնող տարեշրջանը մեր Միութեան եւ շրջանակներուն համար, համաշխարհային տնտեսական տագնապին ճնշումներուն պատճառով ունեցաւ իր դժուարութիւնները, սակայն գոհունակութեամբ եւ արդար հպարտութեան զգացումով կը հաստատենք, թէ մեր ընդհանուր գործունէութիւնը եղաւ բեղուն, հայրենիքի եւ սփիւռքի մէջ իրականացուած բազմաթիւ եւ բազմաբնոյթ գործունէութիւններով: Լաւատեսութեամբ կը մաղթենք որ յառաջիկայ տարին ըլլայ տնտեսապէս աւելի հեզասահ եւ բարեբեր: Մեր աշխարհատարած մասնաճիւղերու ազգային, դաստիարակչական, մշակութային եւ բարեսիրական նպատակներէ մեկնող ձեռնարկներու շարքին, նշանակելի էր երիտասարդաց կազմակերպութիւններուն աշխոյժ գործունէութիւնը: Հիւսիսային Գալիֆորնոյ եւ Նիւ Եորքի Երիտասարդ Արհեստավարժներու Խմբաւորումները որոնք իրենց հիմնադրութեան տասնամեակը նշեցին այս տարի, Կեդրոնական Վարչական Ժողովին կողմէ արժանացան յատուկ գնահտանքի: Անոնց ըկերային եւ յարաբերութիւններու զարգացման ձեռնարկներու հասոյթները կը շարունակեն նպաստել Միութեան հայրենի ծրագիրներուն: Ասպարէզային Փորձառութեան Ծրագրի շրջանաւարտները համախմբող ՍԵՒԵՌԱԿԷՏ երկամեայ աւանդական ձեռնարկը, որ այս տարի կայացաւ Շիքակոյի մէջ, դարձեալ աշխարհի ամէն կողմերէն համախմբեց հարիւրաւոր անդամներ: Հիւսիսային եւ Հարաւային Ամերիկաներու եւ Միջին Արեւելեան մեր երկրորդական ութը վարժարաններէն 250 մրցունակ շրջանաւարտներ, փայլուն յաջողութիւններով անցան համալսարան: Անոնցմէ շատեր առիթը ունեցան այցելելու Հայաստան եւ շաղուելու հայրենի իրականութեան հետ: Տիթրոյթի Ալեքս եւ Մարի Մանուկեան Վարժարանը օժտուեցաւ երկրորդական բաժնի նորակառոյց արդիական շէնքով, Լուիզ եւ Րիչըրտ Մանուկեաններու նուիրատուութեամբ, իսկ Միութեան Փասատինայի երկրորդական Վարժարանը եւ Կեդրոնը զօրացան Վաչէ եւ Թամար Մանուկեաններու առատաձեռն հովանաւորութեամբ: Հ.Բ.Ը.Մ.ի Հեռավար Գոլէճի համացանցային ծրագիրը յաջողութեամբ աւարտեց վեց լեզուներով իր հայ լեզուի, պատմութեան եւ մշակոյթի ամառնային եւ աշնանային դասընթացքները ու կը պատրաստուի սկսելու իր երրորդ շրջանը հասնելով աշխարհասփիւռ հարիւրաւոր մասնակիցներու: Յաջողութեամբ իրականացան Երեւանի, Նիւ Եորքի եւ Փարիզի ասպարէզային փորձառութեան ծրագիրները, ինչպէս նաեւ Հայաստանի մէջ սփիւռքահայ պատանեկան շրջապտոյտները եւ սկաուտական բանակումները: Հայաստանի Ամերիկեան Համալսարանին Միութեան շարունակուող օժանդակութեան առընթեր, Աշխարհի տարբեր երկիրներու մէջ բարձրագոյն ուսման հետեւող աւելի քան 300 յաջողագոյն ուսանողներ ստացան համալսարանական կրթաթոշակ՝ տարբեր մասնագիտական ճիւղերու շարքին յատկապէս կատարողական արուեստներու, հասարակական գիտութիւններու եւ հոգեւորականութեան պատրաստութեան մարզերու մէջ: Երկրորդ տարին ըլլալով, կատարողական արուեստի մեր տաղանդաւոր աստղերէն երիտասարդ նոր խումբ մը ելոյթ ունեցաւ Նիւ Եորքի Գարնէկի Հոլի սրահին մէջ: Հայաստանի եւ Ղարաբաղի մէջ Միութեան մնայուն ծրագիրներուն եւ ներդրումներուն, յատկապէս մանկապատանեկան արուեստի կեդրոններուն, տարեցներու ճաշասրահներուն եւ Հայաստանի ճատրակի Ֆէտէրասիոնի հովանաւորութեան շարունակուող օժանդակութեան առընթեր, ամբողջացան Նուպարաշէնի մարզամշակութային համալիրի կառոյցը եւ Գրողներու Միութեան հրատարակչատան սարքաւորումը: Հայաստանեայց Եկեղեցւոյ հոգեւոր դերին նկատմամբ բծախնդրօրէն հոգածու՝ Հ.Բ.Ը.Մ.ը շարունակեց իր սերտ աջակցութիւնը Մայր Աթոռ Ս. Էջմիածնին, հայ հոգեւոր եւ մշակութային հարստութիւններու պահապանումին եւ ուսումնասիրութեան համար միջոցառումներու բարեկարգումին ինչպէս նաեւ շինարարական շարունակուող ձեռնարկներու ուղղութեամբ իր ներդրումներով: Եւրոպայի մեր շրջանակը եւ Նուպարեան Մատենադարանը, յատկանշական գործունէութիւն ծաւալեցին միջազգային ակադեմական եւ քաղաքական լայն շրջանակներու մօտ հայ ժողովուրդի իրաւատիրութեան, մշակութային կոթողներու պաշտպանութեան, ինչպէս նաեւ Ղարաբաղի Հարցի պատմական հոլովոյթի իրականութիւնները Եւրոպական հանրային կարծիքին ծանօթացնելու ուղղութեամբ կազմակերպուած գիտահամաժողովներով: 2009 տարին մեր բոլորին յիշողութեան մէջ պիտի նշուի նաեւ մեր ժողովուրդի պատմութեան մէջ հանգրուանային երեւոյթ հանդիսացող Հայաստան-Թուրքիա սահմանային եւ դիւանագիտական յարաբերութիւններու վերաբերեալ իրադարձութիւններով, որոնց կապակցութեամբ մեր Միութիւնը ունեցաւ յատկանշական դիրքորոշում: Աշխարհատարած եւ հայրենաբնակ հայութիւնը յուզող եւ շարժման մղող այս զարգացումները, նոր շեշտաւորում տուին Հ.Բ.Ը.Միութեան հայրենակեդրոն գործունէութեան, ինչ որ համոզուած ենք պիտի բնորոշէ նաեւ մեր մասնաճիւղերու հետագայ գործելակերպը, Հայաստանի իրականութիւնը սփիւռքահայութեան մտասեւեռումին կեդրոնը պահելու եւ մեր գործունէութիւնները, մասնաւորաբար երիտասարդութեան պարագային, հայրենի առօրեային եւ զարգացումներուն շաղկապելու իմաստով: Այս ուղղութեամբ կարեւոր է նաեւ, որ մեր մասնաճիւղերը քաջալերեն իրենց շրջանակներու մասնակցութիւնը սփիւռքահայ երիտասարդութեան համար Հայաստանի մէջ Միութեան կազմակերպած ծրագիրներուն: Գոհունակութեամբ կը նշենք նաեւ այն իրողութիւնը, թէ նոր եւ գործարար ուժերով ամբողջացած մեր շրջանակներու յանձնաժողովներէն, մասնաճիւղերու վարչութիւններէն եւ կրթական յանձնախումբերէն շատերը, իրենց դիմագրաւած ծանր մարտահրաւէրներուն դիմաց, ապագայ զարգացումներու նախատեսութեամբ կը սերտեն եւ կը ծրագրեն կազմակերպչական նոր միջոցառումներ: Կը յուսանք որ Մութեան աջակցութիւնը վայելած բազմահազար մեր շրջանաւարտները ի վերջոյ աջակից կը դառնան այս աշխատանքներուն: Նոր ուժերու ներգրաւումը եւ տեղական միջոցներու արդիւնաւոր գործածութիւնը, որոնք կարելի կը դարձնեն մասնաճիւղերու ինքնաբաւ գործունէութիւնը, կարեւոր նախադրեալներ են Միութեան ընդհանուր ծրագիրներու յաջողութեան համար: Առ այդ, ձեզի կը փոխանցենք Նոր Տարուան եւ Ս. Ծնունդի մեր ջերմագին բարեմաղթութիւնները, բարգաւաճ գործունէութեան եւ յաջողութեան լաւագոյն մաղթանքներով:

Յարգանքներով՝

Պերճ Սեդրակեան

Նախագահ