ՀԲԸՄ-ի մասին

"ԲԱՑԱՀԱՅՏԷ ՀԱՅԱՍՏԱՆԸ" ԴԱՍՏԻԱՐԱԿՉԱԿԱՆ ՇՐՋԱՊՏՈՅՏ ԴԷՊԻ ՀԱՅԱՍՏԱՆ, 2008

Հայկական Բարեգործական Ընդհանուր Միութեան հայաստանեան ծրագիրներուն մաս կը կազմէ նաեւ «Բացահայտէ’ Հայաստանը» վերտառութեամբ դաստիարակչական շրջապտոյտները 15-18 տարեկան սփիւռքահայ պատանիներու համար: Ինչպէս նախորդ չորս տարիներուն, 2008ին նոյնպէս յաջողութեամբ գործադրուեցաւ ծրագիրը` 8-27 Օգոստոս օրերուն: Հայաստանի մէջ ՀԲԸ Միութեան երիտասարդական ծրագիրներու համակարգող Տիկին Հերմինէ Տիւզեանի ղեկավարութեամբ 22 պատանիներ եւ պարմանուհիներ 6 երկիրներ ներկայացնող 13 քաղաքներէ` Ֆրանսա (Փարիզ, Մարսէյլ, Վիէնն, Վալանս, Պորտօ) Ամերիկայի Միացեալ Նահանգներ (Նիւ Ճըրզի, Նիւ Եորք, Կալիֆոռնիա), Կանատա (Թորոնթօ, Մոնթրէալ), Լիբանան (Պէյրութ), Պելճիքա (Անվերս), Գերմանիայ (Միւնիխ) անմոռանալի օրեր անցուցին Հայաստանի մէջ: Արդարեւ, Ս. Էջմիածին, Ծիծեռնակաբերդ, Սարդար-ապատ, Նորքի Հայորդեաց տուներ, Գառնի, Գեղարդ, Օշական, Սեւան, Վազգէնեան ճեմարան, Նորավանք եւ այլ տեսարժան վայրեր ու թանգարաններ կատարուած այցելութիւններու կողքին, պատանիները մասնակցեցան նաեւ Խոր Վիրապ գիւղի չքաւոր ընտանիքներու բնակարաններու նորոգութեան աշխատանքներուն` Ֆիւլլըր կազմակերպութեան հետ համագործակցաբար: Օգտակար աշխատանքներու շարքին պատանիները մասնակցեցան նաեւ Խոսրովի անտառի արգելոցի շրջակայքի մաքրութեան, այս պարագային World Wildlife Fund-ի հետ: Սփիւռքահայ պատանիներուն համար իւրայատուկ օր մըն էր Արագած լեռ բարձրանալը, որմէ ետք հաճելի եւ ուրախ երեկոյ մը անցուցին Լերմոնտովոյի ՀԲԸ Միութեան բանակավայրին մէջ` երգիչներ Շուշան Պետրոսեանի եւ Արսէն Գրիգորեանի ընկերակցութեամբ: Խումբը այցելեց նաեւ Արցախ, ուր առիթ եղաւ նաեւ ծանօթանալու ՀԲԸ Միութեան տեղւոյն ծրագիրներուն, ինչպէս նաեւ շրջելու Շուշիի եւ Գանձասարի մէջ: